അക്ഷരം:aksharam‌‌

കമന്റ് അഗ്രഗേറ്റര്‍‌മാരും ഐപി പിടിത്തവും

noreply@blogger.com (അനില്‍_ANIL) — Sun, 24 Jun 2007 14:54:00 +0000

മുന്നറിയിപ്പ്: ഏറെ നാളുകളായി മലയാളം ബ്ലോഗുകളില്‍ ചര്‍ച്ചകള്‍ക്കും അതിലുപരി വിവാദങ്ങള്‍ക്കും ഇട നല്‍കിയ ഒരു വിഷയത്തില്‍ ഒരു പോസ്റ്റുകൂടി എന്നു കരുതി എന്നെ തല്ലാതെ വിടുക. :)

മുഖാമുഖങ്ങളില്‍ പാലിക്കാന്‍ നമ്മള്‍ ശ്രദ്ധിക്കാറുള്ള പരസ്പര ബഹുമാനവും മര്യാദകളും ബ്ലോഗുകളിലൂടെ സം‌വദിക്കുമ്പോള്‍ ഉണ്ടാവുന്നില്ല എന്നതാണ്‌ ഏറിയ പങ്ക് വിഷയങ്ങളേയും വഷളാക്കിയതെന്ന് നിരീക്ഷിക്കാനാണ്‌ ഞാനിഷ്ടപ്പെടുന്നത്; പുതിയ വിവാദത്തിനല്ല.

കുറച്ചു കാലം മുമ്പ് ഒരു ഹോക്സ് ഇറങ്ങിയിരുന്നത് ഓര്‍ക്കുന്നുണ്ടാവും പലരും. ഏഓഎല്‍-മൈക്രോസോഫ്റ്റ് എന്നിവര്‍ ചേര്‍ന്ന് ചുമ്മാ നിങ്ങള്‍ക്ക് പതിനായിരം ഡോളര്‍ എങ്കിലും തരുമെന്ന്. വെറുതേ ഒരു മെസേജ് പലര്‍ക്കും ഫോര്‍‌വേഡ് ചെയ്താല്‍ മതി. അയയ്ക്കപ്പെടുന്ന ഓരോ അഡ്രസിനും $245 വച്ച് തരും! ബില്‍‌ഗേറ്റണ്ണന്‍ നമ്മളയയ്ക്കുന്ന ഫോര്‍‌വേഡുകളൊക്കെ അങ്ങ് ട്രാക്ക് ചെയ്തിട്ടാണ്‌ സമ്മാനത്തുക നിശ്ചയിക്കുന്നതത്രേ.
ചില വാര്‍ത്തകള്‍:
http://urbanlegends.about.com/library/weekly/aa051299.htm
http://antivirus.about.com/od/emailhoaxes/a/maoltrack.htm (ഇത്തരത്തിലുള്ള പല ലിങ്കുകളും ഈ പേജില്‍ തന്നെ കാണാം)

ബ്ലോഗര്‍ സെറ്റിങ്ങുകളില്‍ (Comment Notification Address) നിന്ന് കമന്റുകള്‍ ഏതെങ്കിലുമൊരു ഇ-മെയില്‍ ഐഡിയില്‍ അയയ്ക്കുക വഴിയാണല്ലോ നിലവില്‍ കമന്റ് അഗ്രഗേറ്റ് ചെയ്യുന്ന ഗ്രൂപ്പുകളിലേയ്ക്ക് കമന്റുകള്‍ എത്തുന്നത്.
പ്രസ്തുത ഇ-മെയില്‍ ഐഡിയില്‍ എത്തിച്ചേരുന്ന കമന്റുകളെ നിലപാടുകള്‍ അനുസരിച്ച് ആവശ്യാനുസരണം തരം തിരിക്കലോ ഫില്‍റ്ററിങ്ങോ നടത്തിയിട്ടാണ്‌ ഗ്രൂപ്പുകളില്‍ കമന്റുകള്‍ പോസ്റ്റു ചെയ്യപ്പെടുക.
ഗ്രൂപ്പുകള്‍ക്ക് ഉദാഹരണം:
1. http://groups.google.com/group/blog4comments
2. http://groups.google.com/group/marumozhikal

ഓരോ കമന്റും ചെയ്യുന്നവരുടെ ഐപി അഡ്രസ് മേല്പ്പറഞ്ഞ അഗ്രഗേറ്റര്‍ നടത്തിപ്പുകാരില്‍ എത്തിച്ചേരുമെന്ന മട്ടിലാണ്‌ പഴയ ബ്ലോഗര്‍മാരും മികച്ച കമ്പ്യൂട്ടര്‍ പ്രൊഫഷണലുകളുമായ പലരും ഇപ്പോഴും കരുതിയിരിക്കുന്നുവെന്നാണ്‌ ഞാന്‍ മനസിലാക്കിയിട്ടുള്ളത്. എനിക്കു പ്രിയപ്പെട്ട പല കൂട്ടുകാരും ഈ വിഷയം ഉന്നയിച്ച് പലയിടത്തും കമന്റെഴുതിയിരിക്കുന്നത് പലപ്പോഴും കാണാനിടവന്നിട്ടുണ്ട്. ഒരുദാഹരണം. ഇതിനു മറുപടി അര്‍ഹിക്കാത്തതുകൊണ്ടാണോ എന്നറിയില്ല ആരും പ്രതികരിച്ചു കണ്ടുമില്ല.

എന്റെ അറിവില്‍ ബ്ലോഗുകളിലെ സന്ദര്‍ശകരുടെ വിവരങ്ങള്‍‍ അറിയാന്‍ ഏതെങ്കിലും ഹിറ്റ് കൗണ്ടര്‍ അക്കൗണ്ടുകള്‍ ഉപയോഗിക്കുകയും അവര്‍ തരുന്ന സ്ക്രിപ്റ്റ് ബ്ലോഗ് ടെമ്പ്ലേറ്റില്‍ ഉള്‍പ്പെടുത്തുകയും, വേണ്ടപ്പോള്‍ ഹിറ്റ് കൗണ്ടര്‍ ദാതാവിന്റെ സൈറ്റില്‍ ലോഗിന്‍ ചെയ്ത് റിപ്പോര്‍ട്ടുകള്‍ നോക്കുകയും ചെയ്യണം. ഇങ്ങനെയല്ലാതെ ബ്ലോഗുസന്ദര്‍ശകരുടെ വിവരങ്ങള്‍ കണ്ടുപിടിക്കാവുന്ന സം‌വിധാനം ഉണ്ടെങ്കില്‍ ദയവായി എനിക്കും കൂടി പറഞ്ഞുതരുക.

കാര്യങ്ങള്‍ മനസിലാക്കുമ്പോള്‍ അവ യുക്തിഭദ്രവും വസ്തുനിഷ്ടവുമായിരുന്നാല്‍ അതാവില്ലേ ഊഹാപോഹങ്ങളെ ആശ്രയിക്കുന്നതിനേക്കാള്‍‍ മെച്ചം?

ജെമല്‍ (ഗമല്‍)

noreply@blogger.com (അനില്‍_ANIL) — Sun, 27 Aug 2006 11:43:00 +0000

ജെമല്‍ (ഗമല്‍)

വേഴം

noreply@blogger.com (അനില്‍_ANIL) — Wed, 07 Jun 2006 07:00:00 +0000

“ഹലോ... എഴ്ന്നേക്കാറായില്ലേ... ങേ ? ഇന്ന് ബുധനാഴ്ചയേ ആയിട്ടുള്ളേ... മണി ഏഴേകാലാവുന്നു... ”

അലാറങ്ങളും സ്നൂസുകളുമൊക്കെ തീര്‍ന്നിരിക്കുന്നു. ഇനി പ്രതീക്ഷിക്കാന്‍ ഒന്നുമില്ല. കിടന്നിട്ടു കാര്യവുമില്ല. എങ്കിലും ഒരു മിനിറ്റൊന്നുകൂടി റിലാക്സ് ചെയ്തില്ലെങ്കില്‍ ദിവസം മുഴുവന്‍ നീളുന്ന തലവേദന ഉണ്ടാവും എന്നങ്ങു സങ്കല്‍പ്പിച്ച് ഒന്നു തിരിഞ്ഞു കിടന്നു.

“പുതിയ നിയമം അറിഞ്ഞില്ലേ? ബ്ലോഗറില്‍ പ്രൊഫൈല്‍ ഉണ്ടാക്കിയവരൊക്കെ ഒരു ബ്ലോഗെങ്കിലും ഉണ്ടാക്കിയിരിക്കണം. കൂടാതെ മാസത്തിലൊരു പോസ്റ്റെങ്കിലും ചെയ്യണം. അല്ലാത്തവര്‍ക്കൊന്നും ഐഡി കൊടുക്കില്ല. അവരുടെ വിസ പുതുക്കില്ല.”

നിയമങ്ങള്‍ ഇരുട്ടിവെളുക്കുമ്പോ ഉണ്ടാവുകയും ഇല്ലാതാവുകയും പുതുമയല്ലാത്തതുകൊണ്ട് കേട്ടിട്ട് പ്രത്യേകിച്ചൊന്നും തോന്നുന്നില്ല. പക്ഷേ വിസപുതുക്കുന്നില്ലാന്നൊക്കെ പറയുമ്പോള്‍... ലോണ്‍ തീരാതെ കേറിപ്പോവാന്‍ ചെന്നാല്‍ എയര്‍പോര്‍ട്ടീന്നേ തട്ടി അകത്തിടും.എങ്ങിനെയും വിസ ഒന്നു നിലനിര്‍ത്തണം.

പക്ഷേ ആരാണീ വാര്‍ത്ത പറയുന്നത്?അയ്യോ. അത് ഉമേഷ്ജി ആണല്ലോ. ആനപ്പുറത്ത് മോനെയും കെട്ടിപ്പിടിച്ചിരുന്നാണ് ഡയലോഗടി.

അല്ലാ ഇവരെങ്ങനെയാ മുന്‍‌വാതില്‍ കടന്ന് എന്റെ കിടക്കയ്ക്കരികിലെത്തിയത്?

“എഴിയെടേ ചെല്ലാ”
“ഇപ്പോ പോസ്റ്റുകളൊന്നും ഇല്ലല്ല്... കമന്റുകളടിച്ചു നടന്നാല്‍ മത്യോ അപ്പീ? വ്വാ എന്തരു ചെയ്യാന്‍?”

കറകളഞ്ഞ, ഒന്നാന്തരം എം.റ്റി/മഞ്ജുവാര്യര്‍ ബ്രാന്‍ഡ് മൊഴി വരേണ്ടുന്നിടത്തൂന്ന് തിരുവന്തരത്തെ വേഴം കേട്ട് ഞെട്ടിത്തെറിച്ചു കണ്ണുതുറന്നപ്പോഴുണ്ട് ദേ അദര്‍ ഹാഫുണ്ട് പിന്നീം നിക്ക്‌ന്. ആനപ്പുറത്തല്ല, മുള്ളിന്റെ പൊറത്ത് പിള്ളാര്‍ടെ യൂണിഫോമും തൂക്കിപ്പിടിച്ച്.
---
This part of the സ്വപ്നം was sponsored by: വിശാലന്‍ ഏന്റ് ഉമേഷ്

ഗൂഗിള്‍ മലയാളത്തില്‍ : Malayalam Google Interface

noreply@blogger.com (അനില്‍_ANIL) — Sun, 26 Feb 2006 17:23:00 +0000

ഏറെ നാളുകളായി തെരക്കും യാത്രകളും മറ്റും മറ്റുമായിരുന്നതുകൊണ്ട് ബൂലോഗത്തെന്നല്ല ഇന്റര്‍നെറ്റില്‍ തന്നെ എത്തിനോക്കാന്‍ കഴിഞ്ഞിരുന്നില്ല. ഇന്ന് (ഈസ്റ്റ് കോസ്റ്റ് വിജയന്‍ പറയുന്നപോലെ) “എങ്ങനെയോ എവിടെയോ എപ്പോഴോ എന്തിനോ” ഗൂഗിള്‍ മലയാളത്തില്‍ പ്രതികരിക്കുന്നതുകണ്ടെത്തി.ഇതിനകം ആരെങ്കിലുമൊക്കെ കണ്ടെത്തുകയോ അതേപ്പറ്റി എഴുതുകയോ ഒക്കെ ഉണ്ടായിക്കാണും എന്നു തോന്നുന്നുണ്ടെങ്കിലും എന്റെ ഒരു സന്തോഷത്തിനുവേണ്ടി അതിന്റെ ഒരു ‘സേമ്പിള്‍’ ഇവിടെ.

പൂച്ചകള്‍

noreply@blogger.com (അനില്‍_ANIL) — Sat, 07 Jan 2006 07:16:00 +0000

അങ്ങു ദൂരെ അമേരിക്കായിലെങ്ങാണ്ടൊരു പൂച്ച ഒരു കാറിന്റെ ആക്സിലില്‍ പറ്റിപ്പിടിച്ചിരുന്ന് 70 മൈല്‍ സഞ്ചരിച്ചെന്ന് രാവിലെ ഏഷ്യാനെറ്റ് വാര്‍ത്തയില്‍ കൌതുകവാര്‍ത്ത.
മിടുക്കനും സാഹസികനുമായ ആ പൂച്ചയെപ്പറ്റി റിപ്പോര്‍ട്ട് ചെയ്ത അമേരിക്കാക്കാര്‍ (ഏഷ്യാനെറ്റും) നമ്മുടെ നാട്ടിലെ ട്രക്കര്‍/ജീപ്പ് എന്നിവയില്‍ പറ്റിപ്പിടിച്ചിരുന്ന് നൂറുകണക്കിനു മൈലുകള്‍ ദിനവും താണ്ടുന്നവരെയൊന്നും കണ്ടിട്ടില്ലായിരിക്കും എന്നു സമാധാനിച്ചു.

ജ്വാലിയ്ക്കെത്തിയപ്പോഴാണടുത്ത മനസ്സമാധാനക്കേട്.
വൈദ്യന്മാര്‍ തലങ്ങും വിലങ്ങും ഗൂഗ്ലിങ്ങും മെയില്‍ തുറക്കലും നടത്തി കുരുക്കുന്ന നെറ്റ്വര്‍ക്കില്‍ മൈക്രോസോഫ്റ്റിന്റെ വാതില്‍പ്പഴുത് എന്തു കുണ്ടാമണിയാണുണ്ടാക്കുയെന്ന് വേവലാതിപ്പെട്ട് നെറ്റ് കണക്ഷന്‍ ഒന്നു നിര്‍ത്തിച്ചിട്ട് ഒരു സര്‍വാണി പാച്ച് സദ്യ നടത്താന്‍ നോക്കി; ആട്ടോ അപ്‌ഡേറ്റൊക്കെ ആയിവരാന്‍ നേരമെടുക്കും.

എലിയുടെ പ്രാണവേദനയ്ക്കിടെ തന്നെ പൂച്ചവൈദ്യന്മാര്‍ക്ക് ബാങ്ക് സൈറ്റില്‍ ലോഗിന്‍ ചെയ്ത് സാലറി എത്തിയോന്നു നോക്കണം, അല്ലെങ്കില്‍ ഇ-ട്രേഡിലെ നിലവാരം അറിയണം. അത്തരം കളികളൊക്കെ ഈ പാച്ചൊന്നു പറ്റിച്ചിട്ടാവാമെന്നു പറഞ്ഞാല്‍ മനസിലാവില്ലെങ്കില്‍ അനുഭവിക്കട്ടേന്നു കരുതി നെറ്റ് കണക്ഷന്‍ ഓണാക്കിക്കൊടുത്തു.
കാത്തിരിപ്പു സമയം, WMF vulnerability പുറം ലോകത്തെങ്ങനെ ബാധിച്ചെന്നു യാഹു വാര്‍ത്ത പറയുന്നൂന്നറിയണമല്ലോന്നു കരുതി അവിടെച്ചെന്നപ്പോഴുണ്ട് ദാ പിന്നെയുമൊരു പൂച്ച! Cat dials 911, saves man's life
‘Hero’ cat apparently dials 911 to help owner

New Year

noreply@blogger.com (അനില്‍_ANIL) — Sat, 31 Dec 2005 17:02:00 +0000

പ്രിയപ്പെട്ട എല്ലാ കൂട്ടുകാര്‍ക്കും

പുതുമയും സമൃദ്ധിയുമാര്‍ന്ന നവവര്‍ഷം ആശംസിക്കുന്നു!

അനില്‍-സുധ-നിധിന്‍-നിഖില്‍.

പുട്ടടി

noreply@blogger.com (അനില്‍_ANIL) — Tue, 13 Dec 2005 20:33:00 +0000

കെ എസ് പിയ്ക്കൊരടിക്കുറിപ്പ്.

പുട്ട്-പയര്‍-പപ്പടം നല്ല ചേരുവ തന്നെയാണ്.
‘നമ്മളവിടെ’ ഒരു വ്യത്യാസമുള്ളത്, പുട്ട് അവിയ്ക്കലാണ്; ചുടലില്ല.
പുട്ടൊരു മഹാനാണെങ്കിലും പ്രാതലിനതു കിട്ടുമ്പോള്‍ മിക്കപ്പോഴും മുഴുവന്‍ കഴിക്കാനോ ആസ്വദിക്കാനോ പറ്റാറില്ല. ജോലിയ്ക്കു കയറേണ്ട സമയമൊക്കെ ആവുമ്പോഴേയ്ക്കുമാണ് പുട്ടിന്റെ മുന്നില്‍ എത്തുന്നതെന്നതു തന്നെ കാരണം. കുട്ടിക്കാലത്തുമുതല്‍ ഇന്നുരാവിലെ വരെയും ഈ വിധി മാറ്റമില്ലാതെ തുടരുന്നു. പുട്ടുണ്ടാക്കുന്ന ദിവസം മിക്കവാറും ലേറ്റായിട്ടാവും പ്രഭാതകര്‍മ്മവണ്ടി ഓടുക.
ഇതൊക്കെ കാരണം പ്രവാസത്തില്‍ പുട്ട് - പിട്ട് എന്നാണ് ‘മറ്റേമ്മ‘ (അമ്മയുടെ അമ്മ) പറയുമായിരുന്നത് - രാത്രി മെനുവിലാണ് കൂടുതലും സ്ഥാനം പിടിക്കുക.
മിക്കവാറും സഹയാത്രികര്‍ മേല്‍പ്പറഞ്ഞവരാവുകയുമില്ല. മറിച്ച്, മീന്‍ കറി, സ്റ്റൂ (ഇഷ്ടു!) അങ്ങനെ എന്തെങ്കിലും ആയിരിക്കും.
അരിപ്പൊടി (വെള്ള, ചമ്പാ അല്ലെങ്കില്‍ രണ്ടും), ഗോതമ്പുപൊടി (തനിച്ച അല്ലെങ്കില്‍ അരിപ്പൊടിയൊപ്പം) എന്നിങ്ങനെയൊക്കെ വിവിധങ്ങളായ ചേരുവകളുടെ പരീക്ഷണശാലകള്‍ അടുക്കളയിലും പിന്നെ വയറ്റിലും സ്ഥാപിതമാവാറുമുണ്ട്.

അഛന്റെ അമ്മ ജീവിച്ചിരുന്ന കാലത്തെ പുട്ടോര്‍മ്മ കൂടി പറയാതെ വയ്യ. പള്ളിക്കൂടത്തില്‍ നിന്ന് വൈകീട്ട് അഞ്ചുമണിക്കൊക്കെ എത്തിക്കഴിഞ്ഞാല്‍ വള്ളിനിക്കറും കയറ്റി അമ്മൂമ്മയുടെ അടുക്കള വഴിയൊക്കെ ഒരു കറക്കമുണ്ട്. ‘രാവിലത്തെ ഇത്തിരി പുട്ടിരിക്കണത് എടുക്കട്ടാ?’ന്നൊരു ചോദ്യമുണ്ട്. ഏതെങ്കിലുമൊരു പാത്രത്തില്‍ ഒരു കഷണം പുട്ടും ചോണനുറുമ്പുകളുടെ ഒരു പടയും ഇരിപ്പുണ്ടാവും. തട്ടിയിടേണ്ട താമസം അവന്മാര്‍ ഓടിപ്പോവും; ഞൊടിയിടയ്ക്കുള്ളില്‍ സ്വാദേറിയ പുട്ട് വയറ്റിലേയ്ക്കും.
അമ്മൂമ്മയുടെ ഡയലോഗ് കാലക്രമത്തില്‍ ചെറുമക്കള്‍ അല്‍പ്പം ഭേദഗതി വരുത്തി ഇങ്ങനെ അവതരിപ്പിക്കാറുമുണ്ട്. ‘കഴിഞ്ഞാഴ്ചത്തെ ഇത്തിരി പുട്ടിരിക്കണത് എടുക്കട്ടാ?”

ഫ്രീ

noreply@blogger.com (അനില്‍_ANIL) — Thu, 08 Dec 2005 07:24:00 +0000

മൂന്നു ദിവസം മുന്‍പൊരു വെളുപ്പാന്‍ കാലം ഒരു ചങ്ങാതി ഫോണില്‍ വിളിച്ചു. പെരിങ്ങോടന്‍ സാറിന്റെ ഓണ്‍‌ലൈന്‍ ഉബുണ്ടു ക്ലാസ് ഏകദേശം വെളുക്കുന്നതുവരെ അറ്റന്‍ഡ് ചെയ്യുന്നതുകാരണം ഉറക്കം തുടങ്ങിയിരുന്നില്ലായിരുന്നു. അതുകൊണ്ടുതന്നെ ചങ്ങാതീടെ വിളി ഒരു തൊന്തരവും ആയില്ല.

പറഞ്ഞ വിവരം ഇതാണ്. 4444444 എന്ന നമ്പരിലേയ്ക്ക് ഒരു ബ്ലാങ്ക് എസ്സെമ്മെസ് അയച്ചാല്‍ മൊബൈല്‍ ഫോണിന്റെ ക്രെഡിറ്റില്‍ കുറഞ്ഞത് ദി.10 എങ്കിലും കൂടുമെന്ന്. ഭാഗ്യമുണ്ടെങ്കില്‍ അത്
വലിയ ഒരു തുക തന്നെയാവാം. അല്ലെങ്കില്‍ പലതവണ ചെയ്ത് ആയിരങ്ങള്‍ തന്നെ ഉണ്ടാക്കാം!!!

മുമ്പും ഇങ്ങനെ പല കളികളും കേട്ടിട്ടുള്ളതുകൊണ്ടും എറ്റിസലാറ്റിന്റെ യന്ത്രങ്ങള്‍ ഓരോ അക്കൌണ്ടിന്റെ ട്രാക്കിങ്ങും തീര്‍ച്ചയായും രേഖപ്പെടുത്തും എന്നത് അറിയുന്നതു കൊണ്ടും ചങ്ങാതിയോടുപദേശിച്ചത് ഈ കളി കളിക്കണ്ട എന്നായിരുന്നു.
പിറ്റേന്നു രാവിലെ അറിഞ്ഞു പലരും ഉയര്‍ന്ന ബാലന്‍സുകള്‍ അക്കൌണ്ടില്‍ ഉണ്ടാക്കിയെന്ന്.
നാട്ടിലേയ്ക്കൊക്കെ വിളിച്ച് അത് മുതലാക്കിയവര്‍ ഏറെ താമസിയാതെ തന്നെ വിവരവും അറിഞ്ഞു.എത്ര തുകയായിരുന്നു കാര്‍ഡില്‍ വര്‍ദ്ധിച്ചത് അത്രയോ അതിലും കൂടുതലോ തുക ആ നമ്പരുകളുടെ അക്കൌണ്ടുകളില്‍ റിവേഴ്സ് ചെയ്യപ്പെട്ടു, അന്നു തന്നെ.
ഫലം, ‘പറ്റിച്ചുണ്ടാക്കിയ’ ക്രെഡിറ്റുപയോഗിച്ചു വന്‍ വിളി വിളിച്ചു മുതലാക്കിയ പലര്‍ക്കും ബാലന്‍സ് മെനസ് ഫിഗര്‍ ആയി. കളി എറ്റിസലാറ്റിനോടു വേണ്ട എന്നര്‍ഥം.
ഇതിനെപ്പറ്റി ഔദ്യോഗിക വിശദീകരണം ഒന്നും വന്നിട്ടില്ല എന്നാണറിയുന്നത്.

“എന്റെ പോക്കറ്റടികൾ“

noreply@blogger.com (അനില്‍_ANIL) — Thu, 01 Dec 2005 16:53:00 +0000

പോക്കറ്റടിക്കപ്പെട്ടതായി എല്ലാരും പറയുന്ന കഥകൾ കേൾക്കുമ്പോഴെല്ലാം എനിക്കു ചിരിയാണു വന്നിരുന്നത്. ഇതെന്താ ബോധമില്ലാതെയാണോ യാത്രചെയ്യുന്നത്, പോക്കറ്റിൽ കൈയിട്ട് ഉള്ള കാശൊക്കെ വേറൊരാൾ എടുത്തുകൊണ്ടു പോകാൻ?

ഒരിക്കൽ ഒരു സുഹൃത്തുമൊന്നിച്ച് പ്രൈവറ്റ് ഡി.റ്റി.സി-യിൽ യാത്ര ചെയ്യുന്നു. ആൾക്ക് ശമ്പളം
കിട്ടിയദിവസം. ബസിൽ നടവഴിയ്ക്കരികിലെ സീറ്റും കിട്ടി. 20 മിനിറ്റിന്റെ യാത്രയ്ക്കിടെ ആൾ അല്പമൊന്നു മയങ്ങിക്കാണും. ഇറങ്ങിക്കഴിഞ്ഞ് പോക്കറ്റുതപ്പിയ സുഹൃത്തിന് അവിടെ ഒന്നും കാണാൻ പറ്റിയില്ല. പറ്റിപ്പോയി. അന്നെനിക്കു മനസിലായി ഈ വിരുതന്മാർ ചില്ലറക്കാരല്ല.
എങ്കിലും എന്നെ ഇതുവരെ അവർക്ക് അടിക്കാൻ പറ്റിയില്ലല്ലോ എന്ന അഹങ്കാരമായിരുന്നു.

ആ അഹങ്കാരം അധികം നീണ്ടുനിന്നില്ല. അടുത്തൊരു നാൾ തന്നെ ഡി.റ്റി.സി ബസിൽ തന്നെ നിന്നു യാത്ര ചെയ്യുന്നു. ഹരിനഗറിൽ ഞാനിറങ്ങേണ്ട സ്റ്റോപ്പെത്തുന്നതിനു തൊട്ടു മുമ്പൊരു റൌണ്ട് കറങ്ങിയാണ് വരേണ്ടത്. ആ ചരിഞ്ഞുചുറ്റലിനിടെ ഒരാൾ എന്റെ ഷർട്ടിന്റെ പോക്കറ്റിൽ ഒന്നു സ്പർശിച്ചപോലെ തോന്നി.

ആളെ കണ്ടു; പോക്കറ്റിൽ നിന്ന് ചില്ലറ നോട്ടുകൾ ഉണ്ടായിരുന്നതും ചില അവശ്യവിവരങ്ങൾ
അടങ്ങിയ തുണ്ടുകടലാസുകളും അപ്രത്യക്ഷമായതും അറിഞ്ഞു. ഇറങ്ങിയശേഷം പ്രതിയോട് ആ കടലാസുകളെങ്കിലും തരാൻ അഭ്യർഥിച്ചു. പ്രതി അപകടകാരിയല്ല എന്നും സൈക്കിൾ റിക്ഷക്കാരനോ മറ്റോ പാർട് റ്റൈം ജോബിനിറങ്ങിയതാണെന്നും തോന്നി. അല്ലെങ്കിൽ ഞാൻ അങ്ങനെ ഒരു സാഹസത്തിനു മുതിരില്ലായിരുന്നു. പോക്കറ്റടിക്കാർ കത്തിയും തോക്കുമൊക്കെ കൊണ്ടുനടക്കുന്നവരാണെന്നാണല്ലോ കഥകൾ. ഞാൻ മനസിലാക്കിയെന്നറിഞ്ഞാവണം തൊണ്ടി അതിനകം കൈമാറപ്പെട്ടിരുന്നു. റോഡിനു മറുവശം പോയിട്ട് രണ്ടാം പ്രതിയിൽ നിന്ന് ചില്ലറ ഒഴികെയുള്ള കടലാസുകൾ എന്നെ ഭദ്രമായി ഏൽ‌പ്പിച്ച് പ്രതികൾ രണ്ടും അടുത്ത ബസിൽ ചാടിക്കയറിപ്പോയി. ഒന്നും സംഭവിക്കാത്തപോലെ ഞാൻ റൂമിലേയ്ക്കും.

പിന്നീട് ചിരപരിചിതമായ സ്ഥലത്തു വച്ചാണ് ഇക്കൂട്ടർ എന്നെ ശരിക്കും വഹിച്ചത്.
1989-ൽ യുനെസ്കോയുടെ തിരുവനന്തപുരത്തുവച്ചു നടന്ന ഒരു വർൿഷോപ്പിന്റെ ഡോക്കുമെന്റേഷൻ ജോലികളിൽ ഒരാഴ്ചയോളം പ്രവർത്തിച്ചതിന് Ms. Namtip Aksornkool എന്നുപേരുള്ള Programme Specialist പേരെഴുതിയ ഒരു കവറിലിട്ട് 100-ന്റെ പത്തു നോട്ടുകൾ തന്നു.
സന്തോഷം പങ്കുവയ്ക്കാനായി സുഹൃത്തുമൊത്ത് പാഞ്ചാലി യിൽ കയറി.
ശമ്പളം കിട്ടിയതിന്റെ ബാക്കി കൈയിലുള്ളതിനാൽ കവർ തുറക്കാതെ തന്നെ ബില്ലൊക്കെ സെറ്റിൽ ചെയ്തു.

പതിവായി യാത്രചെയ്യാറുള്ള കല്ലാർ ബസിൽ കയറാൻ വലിയ തെരക്കൊന്നുമില്ലായിരുന്നു. കയറി സീറ്റിൽ ഇരുന്നപ്പോഴേയ്ക്കും കണ്ടക്റ്റർ വന്നു ടിക്കറ്റ് തന്നു. അതിനും കാശ് വേറെ ചില്ലറയിൽ നിന്നു കൊടുത്തിട്ട് വെറുതേ പിൻ‌പോക്കറ്റിൽ ഒന്നു തപ്പി. അതിൽ കവർ പോയിട്ട് അതിന്റെ പൊടി പോലുമില്ല. ബസ് നീങ്ങിത്തുടങ്ങിയിരുന്നു. പങ്കുവച്ച സന്തോഷമൊക്കെ ഒരാളലായി മാറി. എത്രയും വേഗം കണ്ടക്ടറോടു കാര്യം പറഞ്ഞു. അവിടെത്തന്നെയുള്ള പോലീസ് ഐഡ് പോസ്റ്റുകാർ ഒരു ചെക്കിങ്ങ് നടത്തിയെങ്കിലും ഒരു തുമ്പുമില്ലാത്ത പരാതികളുടെ കൂനയിലേയ്ക്ക് എന്റെ കേസും വീണുപോയി.
അവരുടെ മുഖത്തൊരു പുഞ്ചിരി കണ്ടോന്നൊരു തോന്നൽ. ‘നിന്റെ നൂറിന്റെ നോട്ടുകളുടെ ഷെയർ ഞങ്ങൾക്ക് ഏതാനും നിമിഷങ്ങൾക്കകം കിട്ടും മോനേ’ എന്ന് അവർ പറയുന്നപോലെ തോന്നി.

‘ബസിൽ കയറാൻ നേരം ആരെങ്കിലും വഹിച്ച് സ്ഥലം വിട്ടുകാണും’ എന്നാണവർ പക്ഷേ വിധി പറഞ്ഞത്.

അങ്ങനെ വിലപ്പെട്ട ഒരാഴ്ചയുടെ അദ്ധ്വാനം അതിനിടെ കിട്ടിയ സ്റ്റാർ ഭക്ഷണങ്ങളിൽ ഒതുങ്ങി.
കല്ലാർ ബസ് നെടുമങ്ങാട് ലക്ഷ്യമാക്കി നീങ്ങി.

പുതിയ വെല്ലുവിളികൾ

noreply@blogger.com (അനില്‍_ANIL) — Thu, 24 Nov 2005 16:54:00 +0000

ഏറ്റവും അധികം ഉപയോഗിക്കപ്പെടുന്ന ഓപ്പറേറ്റിംഗ് സിസ്റ്റമായ വിൻഡോസ് അതിന്റെ 2000-SP4/XP-SP2 - മുതൽ സാമാന്യം മെച്ചപ്പെട്ട സെക്യൂരിറ്റി നൽകുന്നുണ്ട്; ഓട്ടോമാറ്റിക് അപ്ഡേറ്റിങ്ങിലൂടെ.അതിനു മുമ്പുവരെ ഓ.എസ്./ആന്റിവൈറസ് അപ്ഡേറ്റ്സ് പുതുക്കലിലോ മറ്റോ കാണിച്ചിരുന്ന ചെറിയ മടി പോലും പലപ്പോഴും സിസ്റ്റം റിക്കവറി തുടങ്ങി അനേകം തലവേദനകളായിരുന്നു തന്നിരുന്നത്.

ഇപ്പോഴിതാ അടുത്ത ഘട്ടം വരുന്നു.

ആന്റിവൈറസ്, ഫയർ‌വാൾ, ബാക്കപ്പ്, മീഡിയ പ്ലെയേഴ്സ് തുടങ്ങിയുള്ള അപ്പ്ലിക്കേഷനുകൾക്കു നേരെയാണത്രേ ഇനി പുതിയ വെല്ലുവിളികൾ.

ഇന്നലെ പേടിച്ചോടിയ ഒരദ്ധ്യക്ഷൻ പറഞ്ഞപോലെ കിടക്കയ്കടിയിലെ മൂർഖൻ പാമ്പുകൾ തന്നെയാണിനി കൊത്താനിറങ്ങുക.

ചൊറയെന്നാൽ...

noreply@blogger.com (അനില്‍_ANIL) — Tue, 22 Nov 2005 15:33:00 +0000

ഇന്നു രാവിലെ മുതൽ ഈ സമയം വരെ ഏതാണ്ട് അഞ്ഞൂറ് ഇമെയിലുകളെങ്കിലും ഒരൊറ്റ മെയിൽ അക്കൌണ്ടിൽ കിട്ടി.

സബ്ജെക്റ്റ് : EIM removed a virus(es) from this message, it is safe to check the message/attachment(s)

മിക്കവയിലെയും മെസേജ് ഇതിൽ പറയുന്നപോലൊക്കെത്തന്നെ.

ഇത്രയധികം മെയിലുകൾ ഒറ്റദിവസം കൊണ്ട് അയച്ചുതന്ന ഒരു ഇമെയിൽ വൈറസും ഇതുവരെ എറ്റിസലാറ്റ് കണ്ടിട്ടുണ്ടാവില്ല.

ഇക്കാരണം കൊണ്ട് ഒരേ ഡൊമൈനിൽ നിന്നുള്ള മെയിലുകൾ പോലും രണ്ടുമണിക്കൂറൊക്കെ വൈകിയാണ് കിട്ടുന്നത്. വിൻഡോസ് ഉപയോഗിക്കുന്നവർ ശരിയായ സെക്യുരിറ്റി അപ്ഡേറ്റ്സ്, ‘ജീവനുള്ള’ ആന്റിവൈറസ് എന്നിവ ഉണ്ടെന്ന് ഉറപ്പാക്കുക. ഐ.എസ്.പികൾ എല്ലാ മെയിലുകളിലെയും വൈറസിനെ നീക്കിയിട്ടേ നമുക്കു തരൂ എന്ന് ഒരിക്കലും ഉറപ്പാക്കാനാവില്ലല്ലോ.
w32.sober.x @ mm (Symantec)
W32/Sober @ MM!M681 (McAfee)

ലുലു റമദാൻ സെയിൽ‌ബ്രേഷൻ

noreply@blogger.com (അനില്‍_ANIL) — Fri, 28 Oct 2005 20:40:00 +0000

സൂപ്പർ-ഹൈപ്പർമാർക്കറ്റുകൾ, മാളുകൾ, എയർപോർട് ഡ്യൂട്ടി ഫ്രീ തുടങ്ങി എല്ലാവരും ഭാഗ്യശാലികളെ നറുക്കിട്ടു വീഴ്ത്തുന്നത് സാധാരണയായി കാറുകളോ പണമോ കാണിച്ചാണ്.

പക്ഷേ ഇത്തവണ ലുലു ഒക്ടോ: 5 മുതൽ ഡിസ: 5 വരെ ഓരോ നൂറു ദിർഹംസിന്റെ പർച്ചേസിനോടുമൊപ്പം കൊടുക്കുന്ന കൂപ്പണുകൾ വീഴ്ത്താൻ പോകുന്നത് 10 ഭാഗ്യശാലികളെയാണ്.
അവരുടെ ഒരുവർഷത്തെ;

വീട്ടുവാടക (Aed.30,000 - 60,000)
കുട്ടികളുടെ സ്കൂൾ ഫീസ് (Aed.12,000 - 24,000)
വൈദ്യുതി-വെള്ളം ബില്ല് (Aed.7,200)
ടെലിഫോൺ ബില്ല് (Aed.3,600)
പെട്രോൾ ബില്ല് (Aed.6,000)
ഷോപ്പിങ്ങ് ബില്ല് (Aed.24,000 worth Lulu shopping vouchers)

എന്നിവയെല്ലാം ലുലു കൊടുക്കും.
"ശമ്പളം മുഴുവൻ സമ്പാദിക്കൂ”
“സൌജന്യമായി ജീവിക്കൂ”
എന്നൊക്കെയാണു തലവാചകങ്ങൾ.
ഇതിൽ ‘ഒന്നെങ്കിലും‘ കിട്ടണേ എന്ന് എല്ലാരും ആഗ്രഹിക്കും.

കിട്ടിയാൽ വലിയ നഷ്ടമാണെന്നു കരുതുന്നവരും ഇല്ലാതില്ല;
അവസാനത്തെ ഐറ്റം കമ്പനിയെ വഹിച്ചും മറ്റുള്ളവ കമ്പനി അറിഞ്ഞു കൊടുത്തും ജീവിതം തള്ളിനീക്കുന്ന പാവങ്ങളാണവർ!

-----------------------
അടിക്കുറിപ്പ്: ഇത് ലുലുവിന്റെ ഒരു പരസ്യമല്ല.

ഇത് ഖോര്‍ഫക്കാന്‍

noreply@blogger.com (അനില്‍_ANIL) — Thu, 13 Oct 2005 11:15:00 +0000

ഇത് ഖോര്‍ഫക്കാന്‍.
‘ഗഫൂർ കാ ദോസ്തുമാർ‘ ഒരുകാലത്ത് നീന്തിക്കയറിയിരുന്ന, സ്വപ്നങ്ങളുടെ മനോഹര തീരം.

photos1.blogger.com

noreply@blogger.com (അനില്‍_ANIL) — Mon, 26 Sep 2005 11:53:00 +0000

photos1.blogger.com പടം കയറ്റാൻ ബ്ലോഗർ തന്ന സെർവറാണെങ്കിലും ഞങ്ങൾ യു.ഏ.ഇ. യിൽ ഇരുന്നും നടന്നും ബ്ലോഗുന്നവർക്കത് ബാലികേറാമല തന്നെയാണ്.
അതിലൂടെ ഒരു ഇമേജ് പോലും കാണാൻ നേരായവഴിക്ക് പറ്റില്ലായിരുന്നു.

ആ മല അലിഞ്ഞലിഞ്ഞ് സമതലമൊന്നുമായില്ല. എങ്കിലും ഓണക്കാലത്ത് എന്തൊക്കെയോ സംഭവിച്ചു.
ഒരിടത്തും വിശദവിവരങ്ങൾ കിട്ടാനില്ല; പക്ഷേ ഈകമ്പനി ബ്ലോഗർചിത്രജാലകം മലർക്കെ തുറന്നിട്ടിരിക്കുന്നു.
ഈ അവസരം മുതലാക്കി ദാ ഒരു കൊച്ചു ചിത്രം. എന്നാണീ ജാലകം വീണ്ടും കൊട്ടിയടയ്ക്കുകയെന്നറിയില്ലല്ലോ.

(ഇവിടെ ഇടാനാവാത്ത മറ്റൊരു ഫുജൈറ ചിത്രം http://www.globalsecurity.org/military/facility/images/fujairah-sky.jpg)

ആശാൻ

noreply@blogger.com (അനില്‍_ANIL) — Fri, 09 Sep 2005 08:23:00 +0000

മനുഷ്യസ്നേഹത്തിന്റെയും

പ്രകൃതിസ്നേഹത്തിന്റെയും

മനുഷ്യരൂപമായി

നമ്മോടൊപ്പമുണ്ടായിരുന്ന ആശാൻ,

സ:കെ.വി.സുരേന്ദ്രനാഥിന്

ആദരാഞ്ജലികൾ.

ചർച്ച.

noreply@blogger.com (അനില്‍_ANIL) — Mon, 05 Sep 2005 15:54:00 +0000

സന്ദർശകമുറിയിൽ കാത്തിരിക്കുന്നതിനിടയിൽ കേൾക്കേണ്ടി വന്നത്:

- നമ്മുടെ ആൾക്കാരെ ഒക്കെ എന്നും ശത്രുക്കളായിക്കണ്ട് ദ്രോഹിക്കുന്നവർക്ക് ദൈവം കൊടുത്ത ശിക്ഷയാണ് കട്രീന.

- എത്രായിരം പേരെയാ കൊന്നൊടുക്കിയത്, അഫ്ഗാനിസ്ഥാനിലും ഇറാക്കിലും?

- അവന്റെ നോട്ടിൽ കണ്ടില്ലേ “ഞങ്ങൾ ദൈവത്തിൽ വിശ്വസിക്കുന്നു” എന്നാണ് വെണ്ടയ്ക്കയിൽ എഴുതി വച്ചിരിക്കുന്നത്.

- എന്നിട്ടു ചെയ്യുന്നത് മറ്റുള്ളവരെയെല്ലാം ദ്രോഹിച്ച് അധികാരം സ്ഥാപിക്കാനുള്ള ശ്രമം. ഏതു ദൈവം ഇതെല്ലാം പൊറുക്കും?
മരണം ആർക്കും സ്വന്തമല്ല, എല്ലാവരുടെയും ഒപ്പമുണ്ടുതാനും.

പഠിപ്പ്

noreply@blogger.com (അനില്‍_ANIL) — Sat, 27 Aug 2005 15:56:00 +0000

അലമേലു അമ്മാൾക്ക് കോപം കൊണ്ട് കണ്ണ് കാണാൻ വയ്യാതായി ഇരിക്കുകയാണ്.
അദ്ദേഹം ഇതൊന്നും കാണാൻ ജീവിച്ചിരിപ്പില്ലല്ലോ എന്നുള്ളതാണ് ഏക ആശ്വാസം.
ഓരോ പഠിപ്പുകൾ! സ്റ്റാറ്റസ്സിന്റെ പേരും പറഞ്ഞ് കൊച്ചുമകനെ നാലാം വയസ്സിൽ ദൂരെയുള്ള ഒരു ഇംഗ്ലീഷ് സ്കൂളിൽ ചേർത്തതാണ്.

ഇവിടെ അഗ്രഹാരത്തിനടുത്ത് ഏതെങ്കിലും പള്ളിക്കൂടത്തിൽ മതി എന്ന് അദ്ദേഹവും ഞാനും അന്ന് എത്രയോ പറഞ്ഞതാണ്.

നമ്മളൊന്നും ജീവിച്ച കാലമല്ല ഇപ്പോ.
എല്ലാത്തിനും മത്സരം ആണ്.
നാട്ടിൻപുറത്തെ പഠിപ്പുംകൊണ്ട് ചെന്നാൽ എവിടേയും ജോലി കിട്ടില്ല.
മകനും മരുമകളും നിരത്തിയ കാരണങ്ങൾ പലതാണ്.
എന്നാൽ വർഷത്തിൽ രണ്ടു പ്രാവശ്യം അവധിക്കുവരുമ്പോഴെങ്കിലും സ്വന്തം ഭാഷയും സംസ്കാരവും മനസ്സിലാക്കിക്കൊടുക്കാൻ അപ്പാവോ അമ്മാവോ തുനിഞ്ഞില്ല.
താൻ എന്തെങ്കിലും പറഞ്ഞുകൊടുക്കാൻ തുടങ്ങിയാൽ തന്നെ
‘പാട്ടീ ഉന്നുടെ കാലമെല്ലാം പോയാച്ച്. ഇന്ത കാലത്തിലേ സ്റ്റൈൽ താൻ മുഖ്യമാന വിഷയം‘
എന്നാ കൊച്ചുമോൻ പറഞ്ഞത്.
സ്റ്റൈൽ!
അതു കണ്ടിട്ടു മതിയായി. എല്ലാം പോട്ടെ.
ഇന്നലെ അയ്യർ വന്നിട്ട് പറഞ്ഞ് പോയപ്പോഴാണു സ്റ്റൈലിന്റെ കാര്യം തികഞ്ഞത്.
“എന്നാ അക്കാ ഇങ്കെയെല്ലാം ആച്ച്. ഇനി സൊല്ലി എന്ന പ്രയോജനം.
ആനാ ഇന്തമഠത്തിലേ പയ്യൻ ഇപ്പടിയെല്ലാം സെയ്യലാമാ.?”

“എന്നാച്ച്? സൊല്ലിയാ താനേ തെരിയും?” പാട്ടിക്ക് അരിശം വന്നു.
ഉങ്ക ചിന്ന പയ്യൻ എന്നുടെയ റ്റീ സ്റ്റാളുക്ക് വന്ത് എല്ലാരുക്കും മുന്നാടി “ഇങ്കെ എന്ത ബ്രാൻഡ് കള്ള് കിടയ്ക്കും എന്ന് കേട്ടാച്ച്.“

“കടവുളേ.. അങ്കെയെല്ലാം സെയ്താച്ചാ അവ?“

“ഇത് വന്ത് ഒരു ചിന്ന ടീസ്റ്റാൾ . ഇങ്കെ കള്ള് ഒന്നുമേ കെടയാത്. ഇങ്കെ വന്തു അതെല്ലാം കേക്കലാമാ എന്ന് നാൻ സൊല്ലിയാച്ച്.“

“പിന്നെ മാമാ ഏതുക്കു ഇങ്കെ ‘ബ്രാഹ്മണർ കൾ സാപ്പിടൂം ഇടം‘ എന്ത ബോർഡ് വെച്ചിരിക്ക്? ഇതു താനേ ഉൻ പേര സൊല്ലിയാച്ച്.“

“അവനുക്ക് തമിൾ തെരിയവേ ഇല്ലൈ . എന്നാ കാലം ആയിപ്പോച്ച്. അവനുടയ അപ്പാ അമ്മാക്കിട്ടെ താൻ ഇതെല്ലാം സൊല്ലവേണ്ടിയത്. ആനാ അവ ഒണ്ണുമേ സെയ്യപ്പോകറ്തില്ലേ.“
അയ്യർ വിഷമത്തിൽ പറഞ്ഞ് പോയപ്പോൽ മുതൽ പാട്ടിക്ക് ദേഷ്യം വന്നതാണ്.

എന്തായാലും നാടുകാണാൻ പോയവർ തിരിച്ച് വന്നിട്ട് ചോദിക്കാം എന്ന വിചാരത്തിൽ അമ്മാൾ ഇരിക്കുകയാണ്.
ആലോചിക്കുമ്പോൾ ദേഷ്യം അടക്കാൻ വയ്യ.
എന്തു ചെയ്യാൻ?....

Ambitions

noreply@blogger.com (അനില്‍_ANIL) — Wed, 24 Aug 2005 12:13:00 +0000

മൌണ്ട് എവറസ്റ്റിൽ കയറുന്നതു സ്വപ്നം കാണൂ;
മൂക്കുന്നിമലയിലെങ്കിലും തപ്പിപ്പിടിച്ചു കയറാം

യൂണിക്കോഡിൽ അഞ്ജലിയിൽ ബ്ലോഗാൻ ആശിക്കൂ;
മാതൃഭൂമിയുടെ വികലമായ ഫോണ്ടെങ്കിലും വഴങ്ങും.

ഒരു G5 ന്‌ ആഗ്രഹിക്കൂ;
ഒരു 486 എങ്കിലും കിട്ടും.

ഒപ്പം OS X സ്വപ്നം കാണൂ;
DOS 6.2 എങ്കിലും കിട്ടും.

സലീൻ എസ്‌-7 കാറിന്‌ ആഗ്രഹിക്കൂ;
ഒരു കം മർറ പീപ്പി കാറെങ്കിലും വാങ്ങാം.

വരമൊഴി പോലുള്ള ഒരു പ്രോഗ്രാം ചെയ്യാൻ ആഗ്രഹിക്കൂ;
ഒരു എക്സൽ ഫോർമുല ഇടാനെങ്കിലും പഠിക്കാം

സീയെംഡി ആകാൻ പ്രയത്നിക്കൂ;
ഓഫീസ്‌ ബോയ്‌ എങ്കിലും ആയേക്കാം.

മറ്റുള്ളവരുടെ മനസ്സ്‌ കാണാൻ ശ്രമിക്കൂ;
നിങ്ങളുടെ മനസ്സ് അവിടൊക്കെയും കാണാം.

WYSIWYG in New/Edit Posts

noreply@blogger.com (അനില്‍_ANIL) — Fri, 19 Aug 2005 11:53:00 +0000

Blogger-ൽ Edit Posts ഓപ്ഷനിൽ WYSIWYG കിട്ടാത്തതിനെക്കുറിച്ച് ഉന്നയിച്ച സംശയത്തിനൊരു പരിഹാരം കണ്ടെത്തിയിട്ടുണ്ട്.

ഈ പ്രശ്നം ഉണ്ടായിരുന്ന സമയത്ത് വിൻഡോസ് 2000 എസ്.പി.2-ൽ ഓടുകയായിരുന്നു. വിദഗ്ദോപദേശങ്ങളനുസരിച്ച് എസ്.പി.4-ഉം പിന്നെ അന്നുവരെയുള്ള സകലമാന പാച്ചുകളും കയറ്റിയിട്ടും ഒരു വ്യത്യാസവും കണ്ടില്ല. ഏഓഎൽ-ന്റെ പുതിയ ബ്രൌസർ ഇട്ടും നോക്കി.

എന്റെ കാര്യത്തിൽ അത് സ്ക്രിപ്റ്റ് എഞ്ജിന്റെ തകരാർ ആയിരുന്നു എന്ന് ഇവിടെ നിന്ന് പുതിയത് കയറ്റുന്നതുവരെ മനസിലായില്ലായിരുന്നു. (http://www.microsoft.com/downloads/details.aspx?FamilyId=C717D943-7E4B-4622-86EB-95A22B832CAA&displaylang=en)

Microsoft Windows 98, Windows 98 Second Edition, Windows Millennium Edition, and Windows NT 4.0 എന്നിവ ഉപയോഗിക്കുന്നവർ പുതിയ സ്ക്രിപ്റ്റ് എഞ്ജിൻ എടുക്കേണ്ടത് വ്യത്യസ്തയിടത്തു നിന്നുമാണ്.
( http://www.microsoft.com/downloads/details.aspx?FamilyId=0A8A18F6-249C-4A72-BFCF-FC6AF26DC390&displaylang=en )

Also install Blogger for Word, a great new feature.

കമന്റ് സ്പാം

noreply@blogger.com (അനില്‍_ANIL) — Fri, 19 Aug 2005 07:48:00 +0000

ഈ അടുത്ത ദിവസങ്ങളിൽ പല ബൂലോഗങ്ങളിലും സ്പാം കമന്റുകൾ വ്യാപകമായി വന്നുകാണുന്നു. പിന്മൊഴി ടീം അതിനു ചില പരിഹാരങ്ങൾ ഉണ്ടാക്കാൻ പ്രവർത്തിക്കുന്നു എന്നും കേട്ടു.

അതുവരുന്നതുവരെ കമന്റ് സെറ്റിങിൽ രണ്ടു കാര്യങ്ങൾ ശ്രദ്ധിച്ചാൽ നന്നെന്നു തോന്നുന്നു. ലോഗിൻ ചെയ്യാൻ മടിയുള്ള കൂട്ടുകാർക്കിത് ഒരുപക്ഷേ രസിക്കില്ല. എന്നാലും...

Sign in to http://www.blogger.com/ & goto Settings->Comments
Select "Only Registered Users" for the question "Who Can Comment?"
Select "Yes" for the question "Show word verification for comments?"
Click "Save Settings" button below
Click "Republish" button

ദയവായി സഹായിക്കൂ...

noreply@blogger.com (അനില്‍_ANIL) — Mon, 15 Aug 2005 21:24:00 +0000

ബ്ലോഗ്ഗറിൽ Edit Posts ഓപ്ഷനിൽ എനിക്ക് ഈയിടെയായി ഒരു പ്രശ്നം.

അതിലെ വിസിവിഗ് സൌകര്യങ്ങളൊന്നും കിട്ടുന്നില്ല.
(കാര്യമറിഞ്ഞാൽ നോക്കാമെന്ന് ഒരാളെങ്കിലുമേറ്റ നിലയ്ക്ക് അതിവിടെ കാണിക്കുന്നു.)

ഇങ്ങനെ വരേണ്ടത്:

ഇങ്ങനെയാണിപ്പോൾ വരുന്നത്

പുതുതായി സോഫ്റ്റ്വെയർ ഒന്നും കയറ്റിയിട്ടില്ല.
ഇന്റർനെറ്റ് എക്സ്പ്ലോറർ ആണ് ഇത്തരത്തിൽ എന്നോടു പെരുമാറുന്നത്. ഫയർ ഫോക്സ് നല്ലവൻ :)

Windows 2000 SP4
IE6

നിർദ്ദേശങ്ങൾക്കും സഹായങ്ങൾക്കും ആദ്യമേ നന്ദി.

“സ്വാതന്ത്ര്യം തന്നെ അമൃതം”

noreply@blogger.com (അനില്‍_ANIL) — Sun, 14 Aug 2005 21:32:00 +0000

ചില്ലിട്ട ചാറ്റിങ്

noreply@blogger.com (അനില്‍_ANIL) — Sat, 30 Jul 2005 19:37:00 +0000

ബൂലോഗങ്ങളുടെ അതിരു വിട്ട്‌ രണ്ടു ചില്ലുകൾ നടക്കാനിറങ്ങി. ഒന്ന് പുതിയ യൂണിക്കോഡ്‌ നമ്പരിട്ട ചില്ലും മറ്റേത്‌ പഴയ ചന്ദ്രക്കലക്കാരനും.

നടന്നുനടന്ന് അവർ യാഹൂ മെസഞ്ജറിനടുത്തെത്തി. പക്ഷേ അവിടെ അവരെ പ്രവേശിപ്പിച്ചില്ല. യാഹുവിൽ ബീറ്റാ അടിസ്ഥാനത്തിലാണെങ്കിലേ യൂണിക്കോഡിലെ ആളുകളെ പ്രവേശിപ്പിക്കൂ എന്നൊരു നിയമമുണ്ടത്രേ.
എമ്മെസ്സെനിൽ തങ്ങളുടെ ആൾക്കാരെ കയറ്റുമെന്നു കേട്ട്‌ അവർ അങ്ങോട്ടേയ്ക്കു നീങ്ങി.
അവിടെ ചെന്നപ്പോഴാണറിയുന്നത്‌ അതിലെ ഭംഗിയാർന്ന ചില്ലിന്‌ മൈക്രോസോഫ്റ്റ്‌ ഡോട്‌ നെറ്റ്‌ പാസ്പോർട്ടില്ല എന്ന്.

പിന്നെന്തുചെയ്യും?

യാഹുവിൽ തന്നെ പോയി മംഗ്ലീഷിൽ ചാറ്റുകയേ മാർഗ്ഗമുള്ളൂ.

ചാറ്റിച്ചാറ്റി അവർ കൂട്ടുകാരായി.
ഒന്നും രണ്ടും തമാശകളായി.
തർക്കവിതർക്കങ്ങളായി.
ചിരിയായി.
ഒടുവിൽ...
ഒരു ചില്ലിന്റെ തമാശ മറ്റേചില്ലിനു വിഷമമുണ്ടാക്കി.
സ്മൈലിയിലെ ഒരു തലയും വിക്ഷേപിച്ച്‌ അത്‌ ഇറങ്ങി ഒറ്റപ്പോക്ക്‌.
മറ്റേച്ചില്ലാകട്ടെ ആകെ വിഷമിച്ചു വിഷണ്ണനായി.
യാഹൂ മെസ്സഞ്ജർ തന്നെ അണിൻസ്റ്റാൾ ചെയ്തു - ചെയ്തില്ല എന്നായപ്പോൾ ഇറങ്ങിപ്പോയ ചില്ലിന്റെ വക മറ്റൊരു സ്മൈലി. അയ്യയ്യേ പറ്റിച്ചേ!!!

ചില്ലുകളെ ശരിയായി സ്നേഹിക്കാൻ.

noreply@blogger.com (അനില്‍_ANIL) — Mon, 25 Jul 2005 23:01:00 +0000

Windows 98/NT4/ME/2000/XP എന്നിവ ഉപയോഗിക്കുന്നവർക്ക് അഞ്ജലി/കറുമ്പി എന്നീ ഫോണ്ടുകളിൽചില്ലക്ഷരങ്ങൾ ഒക്കെ ഒരു 'കുത്തുള്ള വട്ടത്തോടെ' കാണുന്നുവെന്ന പ്രശ്നമുണ്ടാകാറുണ്ട്.
കൂടാതെ അഞ്ജലിയിൽ‍ സ്നേഹം എന്ന വാക്ക്‌ സ്നഹേം എന്നും പ്രത്യക്ഷപ്പെട്ടേക്കാം.

ബാക്കി ഇവിടെ പോയി വായിക്കാം.

ഞങ്ങളെ കളിയാക്കൂ... പ്ലീസ്.

noreply@blogger.com (അനില്‍_ANIL) — Wed, 20 Jul 2005 08:43:00 +0000

മൈക്രോസോഫ്റ്റ്‌ കോര്‍പ്പറേഷന്‍ കാറുണ്ടാക്കിയിരുന്നെങ്കില്‍... എന്നുതുടങ്ങി അനേകം തമാശകള്‍ വായിക്കാന്‍ കിട്ടുമല്ലോ.

ഇപ്പോഴിതാ മൈക്രോസോഫ്റ്റ്‌ തന്നെ അവരെപ്പറ്റി തമാശകളെഴുതാന്‍ നിങ്ങളെ ക്ഷണിക്കുന്നു.(Funniest IT Story contest) വെറുതേയല്ല. സമ്മാനങ്ങളുണ്ട്‌.
(അവരുടെ ഉദ്ദേശശുദ്ധിയെപ്പറ്റി എന്നോടു ചോദിക്കല്ലേ.)